EFEMERIDO TOUCANT SANT GÈNT E SOUN ERMITAGE.

1104. — Sant Gènt nais à Mountèu, de parènt paure, mai riche de vertu crestiano. L’oustau que ié neisseguè eisisto encaro vuei e l’an decoura de soun estatuo. 1127. — Lou 16 de mai, Sant Gènt acabo soun eisistènci terrenalo, dins si bèu 23 an e dins la souleso que s’èro chausi à 3 kiloumètre au sud-èst dóu Bausset. 1140. — Aubouron la grand capello de Sant-Gènt au liò mounte  i’avié aquelo que i’avien basti emé li soubro d’un tèmple pagan. 1251. — Lis Aubigés passon à Sant-Gènt, ié saquejon l’abadié e demoulisson en partido la grand capello. Soun empacha miraclousamen de proufana li relicle dóu jouine Sant. 1264. — Lou papo Clemèn IV, qu’èro nascu à Sant-Gile dóu Gard, counfirmo lis indulgènci que si davancié avien acourda i roumiéu que vesitarien la glèiso de Sant-Gènt dins lou terraire dóu Bausset. 1565. — Bulo de Clemèn VI qu’acordo d’indulgènci i roumiéu que vesitarien la glèiso de Sant-Gènt dins lou terraire dóu Bausset. 1632. — L’evesque de Carpentras, Gaspard de Lascaris, enebis en tóuti li prèire de celebra la messo dins la capello de Sant-Gènt sènso sa permessioun. 1634. — Bulo d’indulgènci d’Urban VIII qu’acordo d’indulgènci i roumiéu que vesiton la glèiso de Sant-Gènt au desert. 1636. — Vesito pastouralo au Bausset: l’Evesque aprovo la devoucioun à Sant Gènt, lou councours à soun toumbèu, e ourdouno que si relicle siegon trasferi dins la glèiso parrouquialo. 1643. — Dins sa vesito pastouralo facho au Bausset, lou cardinau Bichi, evesque de Carpentras, se rènd au toumbèu de Sant Gènt e ourdouno tourna-mai de trasferi li relicle dóu Sant dins la glèiso dóu Bausset, pèr fin que se poscon óufri à la veneracioun di fidèu, li pourta en proucessioun e li counserva ’mé segureta. Aquesto traslacioun fuguè diferido. 1652. — Enfin, traslacioun di relicle de Sant Gènt de la capello dóu Sant, au desert, dins la glèiso dóu Bausset, ounte soun plaça toucant l’autar maje, dóu coustat de l’Epistro. 1670. — Creacioun de la Counfrarié de Sant Gènt dins la parròqui dóu Bausset. Dintre lis agrega se remarcon Francés de Gualtéri, 1725; Laurèns-Doumergue Bertet, 1743, foundadou e proumié superiour di prèire messiounàri de Nosto-Dame de Santo Gardo; e Jóusè-Jacint de Bournarèu, 1763, grand-vicàri e óuficiau de Carpentras. 1671. — Bulo de Clemèn X, qu’acordo d’indulgènci i mèmbre de la counfrarié de Sant Gènt, nouvelamen establido dins la glèiso dóu Bausset. 1672. — Aproubacioun, pèr l’Evesque de Carpentras, dis estatut de la counfrarié çai-subre. 1677. — Benedicioun de la capello lateralo bastido à l’ounour de Sant Gènt dins la glèiso parrouquialo dóu Bausset. 1680. — Recoustrucioun de la capello aubourado autre-tèms sus lou cros de Sant Gènt. 1683. — Li relicle de Sant Gènt soun trasferi dóu coustat de l’autar maje, que ié repausavon despièi 1652, dins uno capeleto alestido pèr acò dins la capello lateralo nouvelamen bastido, aqui ié soun mes en segureta pèr un cledis en ferre, pestela de dos sarraio que si clau soun fisado au vicàri emai i priéu de la counfrarié. 1685. — Antòni Fontaine, d’Avignoun, es autourisa pèr lou vice-legat, priéu dóu Bausset, e pèr l’evesque de Carpentras, à-n-abita procho lou cros de Sant Gènt. 1693. — Antòni Fontaine, sucedis à l’ermitan Ilarioun Michel; aquisto l’ancian ermitage qu’apartenié is evesque de Carpentras, emai l’abitacioun de Jan Fauconnier, e bastis l’ermitage magnifi que se vèi encaro, emé l’ajudo d’óumorno di fidèu devot de Sant Gènt. 1696. — Jaque Bernus, de Mazan, fai la caisso de Sant Gènt e lou group que i’es apoundu. 1713. — Dins sa vesito pastouralo au Bausset, l’evesque de Carpentras se rènd à Sant Gènt e recounèis l’autenticita dóu cros dóu Sant dins la pichoto capello. Pèr soun testamen, en dato dóu 30 de nouvèmbre 1713, l’ermito fraire Antòni Fontaine, laisso i prèire messiounàri de Sant Gardo, l’ermitage qu’a fa basti en seguido de l’abitacioun de Jan Fauconnier, sus l’emplaçamen de l’anciano abadié beneditino. 1725. — L’evesque de Carpentras en vesito pastouralo au Bausset, baio permessioun de pourta l’estatuo e li relicle de Sant Gènt i proucessioun facho à sa capello dóu desert. 1727. — Coustrucioun d’un campanau en dessus de la vouto dóu domo de la glèiso de Sant Gènt dóu desert. 1740. — Un endoulible d’aigo toumbo sus lou quartié de Sant-Gènt e l’aigo, qu’envahis la capello, se i’aubouro à l’aussado d’aperaqui tres mètre. 1757. — Li Gardisto arrèndon l’ermitage de Sant Gènt i priéu de la counfrarié dóu Sant, au Bausset, que lou souto-arrèndon à l’ermitan Jan-Pèire Chauvet. 1771. — L’evesque de Carpentras en vesito pastouralo au Bausset, tiro dous tros di relicle de Sant Gènt e li mando à la glèiso parrouquialo de Mountèu. 1774. — Aubouraduro de la Crous de Messioun, au bos de chaine dis Esclavau à l’intrado de la Vau-Santo, eisistant encaro. Lou chaine que serviguè pèr la faire fuguè coupa dins lou pargue dóu castèu de M. de Giry. 1783. — Lou tron toumbo sus lou castèu dóu Bausset e ié fai un encèndi que se pòu pas amoussa. La poupulacioun envoco Sant Gènt e lou vilage es apara emai pareiguèsse inevitable que l’encèndi deguèsse se ié coumunica e lou counsuma. 1793. — Lou 1é de juliet, M. Carias, vicàri amouvible dóu Bausset, fiso à Jan-Francés Mihaud, lou calice de la parròqui, quatre cènt franc qu’apartènon à la counfrarié de Sant Gènt, e lis ournamen de la capello dóu Sant, au desert. 1796. — La capello e lou cros de Sant Gènt soun mes en vèndo e soun croumpa pèr Jóusè Morel, dóu Bausset, au noum de la counfrarié de Sant Gènt en quau li rènd pu tard. 1806. — De reparacioun proun counsiderablo sou facho à la capello de Sant Gènt dóu desert. 1817. — Lou 16 de mai, mai de dès milo roumiéu s’atrobon acampa à Sant Gènt, pèr gramacia lou Sant d’uno plueio aboundouso óutengudo pèr soun intercessioun. La campagno èro estado degaiado mai de tres mes de tèms, dis lou crounicaire, pèr la fre emai un mistralas quàsi de countùnio. 1818. — Francés-Auzias Dounat, vènd à la counfrarié de Sant Gènt, la partido de l’ermitage qu’es au levant. 1819. — Croumpo e benedicioun dóu tablèu qu’es dins lou retable de l’autar de la capello de Sant Gènt dóu desert. 1826. — Lou 27 d’abriéu, ceremounié dóu renouvelamen dóu susàri e verificacioun di relicle de Sant Gènt. 1832. — La capello de Sant Gènt dóu desert es agrandido quasimen de dos part tres; soun campanau es prouvesi d’uno campano. 1833. — Arribado dóu fraire Felipe à Sant Gènt. Ié rèsto tout-bèu-just un an, aguènt pas pouscu s’entèndre emé li priéu de la counfrarié. 1834. — De proucessioun forço noumbrouso, vengudo quàuquis uno de vint à trento kiloumètre, se rèndon à Sant Gènt e soun miraclousamen enausido. 1856. — Agrandimen de la glèiso parrouquialo, pèr l’aubouraduro de la capello en miejo-luno, que ié repauson aro li relicle de Sant Gènt. D’ome de sciènci soumeton dins un labouratòri de Carpentras, l’aigo miraclouso de la font de Sant Gènt à-n-un eisamen di pu minicious: ié rescontron ges de causo couneigudo pèr gari li fèbre. 1864. — Aubouraduro e benedicioun de l’ouratòri dóu lié de Sant Gènt. 1873. — Restablimen de la counfrarié de Sant Gènt dins la parròqui dóu Bausset. 1875. — Lou Municipe dóu Bausset pren uno deliberacioun que pèr aquesto declaro counsenti de vèndre à la fabrico de la glèiso parrouquialo la font miraclouso de Sant Gènt em’un tros de terro atenènto, de la countenènci de quinge cènt cinquanto centiaro. L’ate noutaria de vèndo es passa lou dès de janvié de l’an d’après, estènt conse dóu Bausset, M. Gènt Grabié Milhaud. Vèndo facho à la fabrico de la glèiso dóiu Bausset, pèr Veran Verger, d’un tros fasènt counfront emé la font miraclouso de Sant Gènt, de la countenènci d’aperaqui sege aro. Vèndo souto sing priva facho à M. lou curat dóu Bausset pèr M. Veran Verger, dóu terren que se ié dis la messo en plen èr pèr lou grand councours de setèmbre. L’ate publi,  au noum de la fabrico de la glèiso parrouquialo, es passa en 1877. Mounsegnour Place, evesque de Marsiho, qu’a de fèbre d’acès, es gari en se recoumandant à Sant Gènt emai en bevènt d’aigo de la font miraclouso. Benedicioun d’un autar en mabre Cararo, ès-voto de M. H. Barrellet, d’Avignoun, pausa dins la capello de Sant Gènt au Bausset. 1876. — Uno crous mounumentalo es inagurado, la segoundo fèsto de Pasco, sus un di roucas que douminon la font de Sant Gènt. Lou jour dóu grand councours de setèmbre a liò forço soulennamen, en presènci d’ùni milié de pelerin, la benedicioun d’uno estatuo mounumentalo de Sant Gènt, aubourado toucant lou pourtau nord dóu Bausset, à l’intrado de la Vau-Santo. 1877. — Un avignounen M. H. Barrellet, gari miraclousamen pèr l’intercessioun de Sant Gènt, es deputa pèr lou curat dóu Bausset proche de Mounsegnour Dubreil, archevesque d’Avignoun, pèr óuteni l’autourisacioun de rebasti la glèiso de Sant Gènt. Sa messioun es courounado d’un sucès qu’es pas de dire. Lou 25 de mars, l’archevesque d’Avignoun permet de durbi un souscripcioun pèr rebasti la glèiso de sant Gènt: aquesto, gaire de tèms après, ajoun la chifro de quinge milo franc, éu-meme estènt souscrivèire de milo franc. Aubouraduro de la crous dóu Roucas dis Ange, de l’ouratòri dóu Labour e d’aquéu de la font miraclouso. À la demando de l’archevesque d’Avignoun, lou papo Pìe IX douno pèr la nouvello glèiso de Sant Gènt uno pèiro tirado dóu cementèri de Sant Caliste. 1878. — Aubouraduro de l’ouratòri dóu Loup. Lou supèrbi bas-relèu que lou decoro ei l’obro d’Aguste Armand, d’Avignoun. 1881. — Moussu Redon, vicàri-generau de l’archevesque, autentico lou relicle de Sant Gènt que s’atrobo dins la pichoto óuvalo de la caisso. 1883. — Benedicioun d’uno estatuo restaurado de nòu de la Santo Vierge, dounado à la capello de Sant Gènt à la debuto d’aquest siècle, pèr un pïous fidèu de Seguret que l’avié levado i proufanacioun dóu couvènt de Prebaioun, en 1789. Li fres d’aquesto restauracioun soun supourta pèr uno miraculado de Sant Gènt e l’estatuo reçaup lou noum de Nosto-Damo de l’Ermitage. 1884. — Mounsegnour Hasley, archevesque d’Avignoun, autouriso la recoustrucioun de la glèiso de Sant Gènt, em’acò aprovo lou plan dreissa pèr Moussu Veran, architèite de la vilo d’Arle. Lou venera prelat assisto au grand councours dóu mes de setèmbre. Li travai de foundacioun pèr la nouvello glèiso de Sant Gènt óucasiounon la descuberto de toumbo galo-roumano a mai de tres mètre de founs. Li vas trouba à l’entour dis oussamen soun recouneigu pèr data dóu siècle IV au siècle VI de l’èro crestiano. Inaguracioun de la messo d’uno ouro de matin en plen èr sus l’esplanado, souto uno tèndo dreissado pèr la circoustànci. Quàuquis an pu tard, en 1887, se bastiguè lou pichot ouratòri que se vèi encaro vuei. 1892. — Foundacioun de l’Écho de Saint Gens, pichot journau trimestriau dóu santuàri. 1896. — Lou 2 d’avoust, benedicioun de la campano qu’aro s’atrobo à la capello de Sant Gènt, dounado pèr l’abat Gazagne. Dins lou meme tèms aguè liò la benedicioun de la nouvello capello dóu cros, talo que la vesèn vuei. Aquesto fèsto es presidado pèr lou canounge Illy, archiprèire de Sant-Sifrèn, à Carpentras e pèr lou canounge Olivier, vicàri generau de Marsiho, vengu pu tard evesque d’Ajaccio. 1906. — Tre lou mes d’abriéu l’Écho de Saint Gens parèis tóuti li mes. Au proumié de setèmbre dóu meme an banejo pèr lou proumié dóu cop l’Almanach de Saint-Gens. Reparèis chasque an à la meme epoco, valènt-à-dire, lou jour dóu grand councours de setèmbre. 1908. — En janvier parèis uno Vido de Sant Gènt, tèste prouvençau emé la reviraduro en regard. A reçaupu l’imprimatur lou 6 d’avoust 1907, signa pèr Moussu Redon, vicàri generau d’Avignoun. 1996. — Restauracioun de la font de l’ermitage. Gramaci M. Marc Carrera, escultaire, mountelen de neissènço e fidèu vesitaire de l’ermitage la Font di Mountelen a retrouba, en partido soun aspèt d’óurigino. La vaco e lou loup, descapita despièi mai d’un siècle an, chascun, retrouba sa tèsto. — Creacioun de la Coumunauta de Sant Bernadeto