MOUN MANTÈU DE PASTRE.

 

O moun precious e bon mantèu,

Pèr tèms fres siés moun coumpagnoun :

Quand pèr champ mene moun troupèu,

Paisse fin qu'à soulèu tremount.

 

Quand furiouso la mistralado

Boufo à desbana li brau,

Emé tu siéu bèn à la calo

Coume à l'entour de moun fougau.

 

Dins ti ple trove la calour

Que m'adus la pas, lou soulas,

E me ramento la douçour

De ma Maire, dintre si bras.

 

Quand te boute sus mis espalo,

Me remembres l'amountagnage,

Emé si bèlli caminado

Pèr mena l'avé is aupage.

 

Dins lou long debana dis an,

Tu, iéu, sian que mai afreiri;

S'avèn plus lou lustre d'antan

Sian drud de requist souveni.

 

E pèr li Fèsto Calendalo,

Segui de Cadet, lou menoun,

Emé tout lis agnèu en brassado,

Rendèn óumage à l'Enfantoun.