LAUSENJO AU SOULÈU D'ABRIÉU.

 

Mau-grat la cisampo e la marrido sesoun,

Lou pastre amé proun peno en rendènt gràci à Diéu,

A sauva soun troupèu, para sis agneloun :

Sèmpre siés soun soulas, Soulèu dóu mes d'Abriéu.

 

Lou ravigot Printèms boufo soun alenado,

De la terro, la sabo fai dins li regréu :

Plen de proumesso soun pèr la nouvello annado;

Sèmpre siés noste espèr, Soulèu dóu mes d'Abriéu.

 

Di vèrdi pradarié, tóuti bèn enflourido,

La naturo nous trais lou tablèu agradiéu :

E pèr tout lou campèstre es uno respelido;

Sèmpre siés la bèuta, Soulèu dóu mes d'Abriéu.

 

Dins soun brès l'enfantoun risoulejo à la vido,

D'acatoun, li calignaire, lou cor festiéu,

Tout esmougu van desfuia la margarido :

Sèmpre siés nosto gau, Soulèu dóu mes d'Abriéu.

 

E pèr nòsti bon vièi, de ti rai arderous

Mandes dins si cors gausi un sang renadiéu,

E tambèn la fisanço en un vieiounge urous :

Sèmpre siés la bounta, Soulèu dóu mes d'Abriéu.

 

Segound la voulounta dóu divin Creatour

T'enaurant tout esbléugissènt dedins lou Cèu,

En tóuti vas larga ta Forço e toun Amour :

O bon Soulèu d'Abriéu, siés l'Astre lou mai bèu!

 

 

Pèire Tellène